Dore ikibazo cyo gushakana n' umuntu utekereza ko uzamuhindura cg azahinduka ni mumara kubana

Murushako ntabwo ari mukigo ngororamuco nkuko bamwe bajya babyibeshyaho. Umuntu akwereka uko ateye cg ukamubonaho imico runaka wumva rwose utishimiye ariko ukibwira muri wowe ko ni mumara gushakana mwabaye umugore ni umugabo azahinduka. Hari nubeshya mugenzi we ko ariwe akeneye, ko rwose nibagera murugo azitwara neza atazongera kumubabaza.

Iyo bimeze gutyo burya biba bisa naho ushatse baringa, ni ukuvugango uba ushatse uwo agusezeranya kuzaba we cg uwo wibwirako azahinduka we ni mumara kubana, muri make ushakanye ni utariho. Urushako ntabwo ruhindura umuntu, wari ukwiye kumwemera uko umubona, ukamukunda uko ari cg se ukamureka kuko mugihe mutarabana burya uba ugifite amahitamo.

Niba mugenzi wawe ari umuntu ubonaho amanyanga mukiri guteretana, witekereza ko ni mumara gushakana azahinduka umunyakuri cg inyangamugayo. Niba ari umuntu ukubwira uko yiboneye ugusuzugura witekereza ko namara kwambara impeta azahinduka akakubaha. Ntibikwiye ko ukundira umuntu uwo utekereza ko ashobora kuba we, guhinduka n' icyemezo gifatwa n' umuntu kugiti ke.

Mbere yo gufata umwanzuro wo kubana n' umuntu, banza wibaze ngo ese uyu umuntu aramutse adahindutse nkuko mbitekereza cg abinsezeranya, ese nagumana nawe nakwihanganira ibyo mubonaho? Ukwiye kwita cyane no guha agaciro kubyo umuntu akwereka, imico umubonaho mugihe mwitegura kubana, kuko bishobora kukurinda amarira y' igihe kirerekire.